Friday, July 23, 2010

ગઈઢી ઘોડી ને લાલ લગામ.

 રાજા રણમલ ની કેવી ભાયબંધી હશે ઓલા રાજુ સંધી હાઈરે, ગામ નું નામ જ આખું આપી દીધું રાજકોટ અને એય પાછી રાજધાની નું નામ.  આમતો અત્યારે પટેલ, લોહાણા, વાણીયા, ભૂદેવ, ભરવાડ, વાઘરી ની વસ્તી મા સંધી ગોતવા જાવા પડે એટલા રઈ ગયા હશે પણ ૪૦૦ વરસેય રાજકોટ રાજુ સંધી નું જ કેવાય. બોલો આટલા બધા વરસ થઇ ગયા. પણ માણસો ય ગાંડા થયા છે, ૪૦૦ વરહ ની ઉજવણી મા. બાપ મરે એની વાહે દડો કરવાના તૂટતા હોઈ એવા મ્યુનીસીપાલીટી વાળા તો પાછા એમાં કેવા ઘાંઘા થયા છે, જે બાર મહિને એકવાર ધોવાતી નથી એવી બધી સરકારી બિલ્ડીંગુ ને લીલી પીળી લાઈટુ થી ભરી મુઈકી. સરઘસ કાઈઢા. કૈક નવા વાના કઈરા.  ખેડું ના પૈસે તાગડ ધિન્ના કરતા માર્કેટીંગ યાર્ડ વાળા એ તો પાછી ૪૦૧ કિલો ની કેક હોતે ય કાપી નાઈખી, કોના બાપ ની દિવાળી. એક છટકેલે તો ટકા મા વાળ ની ભાત પાડી ને ૪૦૦ લખાઈવુ.

તમને થાહે કે આ શું વરગીગયો છે. બધા ને આડે હાથે લ્યે છે. એ કેવું પડે એમ છે. રાજકોટ ને જાણે વેંચવા મૂકી દીધું હોઈ એમ  કેમ છે વાડી બોલો ને દલા તરવાડી ની જેમ મન ફાવે એમ માણસો ની કાળી મજૂરી થી કામેલા ટેક્ષ્ ના પૈસા આ ભાજપી કોર્પોરેટરો બગાડે છે એ જોઈ ને થાઈ છે મુશરફ ખોટો નથી. સ્કાયવોક ના નામે પૈસા ની ભંભલી ભરવા ગયા પણ સારું કઈરું જનતા એ જ ફોડી નાઈખી. આવું તો કેટલુંય ચવાઈ જાતું હઈશે. આની મોર ૧૫૦ ફૂટ રીંગ રોડ ઉપર ની કરોડો ની સરકારી જમીન મા વાંહે  એક સડેલી મ્યુંનીસીપાલીટી ઓફીસ બંધાવી, આગળ ની કરોડો ની કીમતી જમીન  મફત રાજકોટ ના જાણીતા બિલ્ડર ને દઇ કુંડલી મા ગોળ ભાંગી લીધોતો જ્યાં આજે બીગ બઝાર ઉભું છે.


એટલે સાવ એવું ય નથી કે રાજકોટ મા બધા કાગડા જ છે. છે ને અમારે વિક્રમભાઈ પંડ્યા, મોર જેવા, એને એવો હરખ ચઈડો કે ઉભે પગે વેબસાઈટ બનાવી ને www.rajkot400years.org  ભૂકા કાઢી નાઈખા. કોણ કેદી કેમ આ ૪૦૦  વરહ ના ગઈઢા ગામ ના જનમદિન મા જોડાશે એની બધી માહિતી ઘરે ઘરે પૂછી પૂછી ને ભેગી કરી સાઈટ ઉપર મૂકી દીધી. દેસ પરદેસ થી સાડા તઈનસો માણાસો ના તો અભિનંદન આઇવા. આ સિવાય મેડીકલ કેમ્પ, રક્તદાન શીબીર,નાના ટાબરિયા રમે એવા મેળા, વોકાથોન, નિબંધ સ્પર્ધા, રાજકોટ ને ઓળખો સ્પર્ધા,  અને એવું તો કેટલુંયે થયું. રાબેતા મુજબ સરકારી ખર્ચે રેસકોર્સ મા ફટાકડા ફૂઈટા (એમાં કોઈને ક્યાં કઈ કેવું પડે એમ છે). એટલે અમારે રાજકોટ વાળા વાત ને મુકે નહી. જે હાથ મા લ્યે એની ગઈંધ કાઢી નાખે.

હમણા હમણા તો જેને આવે તેને મેથીપાક બહુ ખવરાવે છે. કોક કૈક ખોટું કરતો પકડાઈ જાઈ, જેમકે ખોટો પત્રકાર બની ને રોફ મારતો હોઈ, કોક છોકરી ની છેડતી કરતો હોઈ, પોલીસ ની રાહ જોવામાં હવે રાજકોટ વાળા બહુ માનતા જ નથી. એવો ધીબેડે એવો ધીબેડે બિચારા ને  ધોળે દિવસે તારા દેખાડે. બેક દી પેલા એકાદ મંદિર ના ભુવા ને હડફેટે લઇ લીધો.

આજકાલ આ જમીનું ની તેજી મા કેટલાય  જે ફાટેલ ખિસ્સે રખડતાતા એને હાથ મા માલ આવતા બિચારાઓ ક્યાંક મન મોળું કરી ને બેઠા હોઈ એવા કેટલાય ધોકે ધોકે ધીબાઈ ગયા. જુનું ક્યાંક મન મળેલું હોઈ પણ તેદી ફક્કડ ગિરધારી હોઈ, અને અત્યારે માલ હાથ મા માંડ આઈવો હોઈ ત્યારે ઓલી પાછી બીજે ક્યાંક ઠેબા ખાતી હોઈ તો જરાક મન મોકલું કરવા આવા બિચારા એના કોક દોસ્તાર ના ખાલી ફ્લેટ મા ઘરે તો પડોસી ની ટી.વી. ની સીરીઅલું થી કંટાળેલી બાયું બહારથી ફ્લેટ ના આંગળીયા બંધ કરી ગામ આખા ને ભેગું કરી પછી છોકરી અને છોકરા બેય ને ધોકાવે.  પોતાના ઘરવાળા હારે સેટિંગ બગડી ગયું હોઈ એનો ખાર બીજા ઉપર થોડો કઢાય છે. પણ આ તો રાજકોટ છે. આયા ગમે ઈ થાઈ.

બાકી અત્યારે તો વરસાદ ની હેલ પડે છે. લાગે છે ૩ ૪ ઈંચ તો બેક કલાક મા નાખી દેશે.
આઈવ મારા વાલા આઇવ..


તિખારો : મોત ને બાઝો તો તાવ આવે.  નો ખબર પડે તો પૂછજો. 

Friday, June 25, 2010

આવરે વરસાદ ઢેબરીયો વરસાદ ઉની ઉની રોટલી ને કારેલા નું શાક

કાચી કેરી માની ગોટલીયું બફાઈ જાઈ એવી ગરમી ગયા પછી પેલી ધાર ના આ ભીના ભીના છાટણા થી આવતી આ ભીનીભીની ધરતી ની સોડમ સુંઘ્યા પછી તો તમારા Estee Lauder ના પરફ્યુમ પણ ગંધાતા હોઈ એવું લાગે.  પણ આ વખતે તો એટલી કેરી ખાધી કે ખાઈ ખાઈ ને પેટ દોણા જેવા કરી દીધા. કેરી પણ એમ આવી આ વખતે. અને મીઠી પણ એવી! અડધી કેરી ખાધે ડાયાબીટીસ ૨૦૦ વધી જાઈ એવી ગળી. તોય ગમે ઈમ હોઈ આ વખતે કેરી આઈવી એટલી ને માણસો એ ખાધી એ એટલી, તોય પેલા વરસાદે કેરી જે પાંચ સાત રુપયે કિલો મળવા માંડે ઈ હજુ પાંચસો રુપયે વીસ કિલો આવે છે. ઈ કચ્છની પાછલા વેતરની સૌથી મીઠી અને ખરેખર અંદરથી ઘાટા કેસરી કલર ની મળે ઈ.
આવી કેરીયું ખાઈ ખાઈ ને  ગરમી એ બહુ નીકળી તી, એટલે આ પેલવેતરો વરસાદ મજો મજો પડાવી ગયો.  ગઈકાલે શેરી મા ઝીણાઝીણા ટેણીયાઓ ને જોઈ નાનપણ યાદ આવી ગયું. તૂટેલી ડોલ નો સળિયા ને પાણી નો બોર કરતા નીકળેલ નળાકાર પથ્થર ની બેય બાજુ ભરાવી રોલર રોલર રમતા. અને વરસાદ પડે એટલે જામોકામી થઇ જાઈ. નાનો લોખંડ નો સળીયો લઇ ને ખુચામણી દાવ રમતા રમતા એક બે નહી પાંચ પંદર શેરી યું કે ખેતર બે ખેતર વયા જાઈ તો ય ખબર નો પડે. અને જેની માથે દાવ આવે એની તો આવી જ બને. બિચારો લંગડી ભરી ભરી ને લાંબો થઇ જાઈ. મફત ની રમતો ની ઈ તો મજા હતી. આવી મજા તો ફૂટ બે ફૂટ ઘરી જાઈ એવા સોફા મા બેઠા બેઠા બસો તઈણસો ડોલર નું Wii રમતા રમતા ય નો આવે.

વરસાદ આવે એટલે જાણે હોથલ પદમણી ફિલમ આવી હોઈ એમ આખું ગામ જોવા ઉભું રહી જાઈ. આવ મારો વાલો આવ એમ એકવાર તો ગઈઢયા ના મોઢામાંથી નીકળી જ જાઈ.અને એ માય વરસતા વરસાદ મા નાવા ની મજા તો વાત જવા દ્યો. રાજકોટ મા તો જાણે હવે ફેશન નીકળી છે. જુવાન છોકરા છોકરી ટુંકી ટુંકી ચડિયું પેરીને નીકળી પડે. પાછા એક બે નહી. પાંચ પંદર આવા બાપ કમાઈ ના બાબુડિયા સ્કૂટર લઇ ને હો હા દેકારા કરતા હાલી મરે. એક બાજુ પાણી ની નદીયું રોડ પર હાઈલી જાતી હોઈ, અને બીજી બાજુ આ નવરી બજાર હોન્ડા કે સ્કુટી ઉપર પોપો પીપી કરતા, રસ્તાની કોરે, દુકાનુંના ઓટે વરસાદ ને પોરો ખાવાની રાહ જોતા ઉભેલા ને  પલાળતા જાઈ. મારા હારા નાના ટેણીયા શેરીયું મા છ્બછ્બયા કરતા હોઈ એનેય ઠેબે ચડાવતા જાઈ.

પણ જે હોઈ ઈ વરસાદ આવે એટલે અમારે ગોરધન ની ચકલી ફૂલેકે ચડે. ગોરધન ઈ અમારે કૈલાશ ફરસાણ ને ભજિયા ની દુકાન વાળો. ગમે એવી ઓળખાણ આપો તો ય સાંભરે જ નઈ. એવો બીઝી થઇ જાઈ. પણ જાણે કેમ બાપ મારી ગયો હોઈ ને વરસાદ પછી કોઈ દીઆવવાનો નો હોઈ, એમાં માણાહ પણ એની દુકાને બટાઝટી બોલાવે. ઉભા ઉભા મેથીના, મરચાના, લસણીયા, પતરી , અડધા કાચા પાકા ફળફળતા ગરમા ગરમ ગોટા ભજીયા ઉલારતા જાઈ ને મોઢા માંથી સીસકારા બોલાવતા જાઈ. વરસાદ બે મીનીટ ખમેંયા કરે ત્યાં તો લાવ લાવ નીકરી પડે. જેનો દુકાને વારો નો આવે ઈ ઘરે જઈને વેન કરે એટલે ઘરવારી બિચારી તરત તાવડો મૂકી, ભાજી કાપી નાખે તોય ઉટીયે બેઠો છાના વીણતો નો હોઈ એમ લાંબો થઇ થઇ ને રસોડા મા ડોકિયા કઈરે રાખે. પણ વારો આવી જાઈ.


હારો વરસાદ આવતા પેલા ની  જે ગરમી નીકળી છે આ વખતે જાણે મુંબઈ મા નો રેતા હોઈ, નાહી ને બારા નીકળી કે પરસેવે રેબઝેબ. પાછી ડોલ ભરવી પડે.  એ.સી. કે કુલર નો હોઈ ઈતો સિંદુરિયા ની ખાણ મા સીધો ધુમ્કો મારવા ભાગે એવો ઉકળાટ, સખ નો પડે ક્યાય. પણ બિલ્લુ કલર ના ખટુમરા રાવણા જાંબુ ને પીળી પીળી ઝીણીઝીણી ગળ્યા સાકાર ના કટકા જેવી રાયણું ખાવાની ભારે મજા પડી ગઈ. હા પાછો કહી દવ, અઢીસો રાવણા જાંબુ તો ગમે એ ખાઈ જાઈ, એમાં માલ થોડો ને ઠળીયો મોટો, પણ અઢીસો રાયણું ખાઈ જાવ તો ભાયડા કેવા. ભેસું ની જેમ બેક કલાક ઓગાળી શકે એવા જડબા જોઈ. અને એમાંય પાછું ખાધા પછી હોઠે જે રાયણ નો ગુંદર ચોટે, કેમેય કરીને ઉખડે નહી. ઝાઝા પાણીયે ધોયે આરો આવે.

હમણા તો રાજકોટીયાવ ની વાહે ઈનકમ ટેક્ષ્ વાળા શું પાડી ગયા છે. સુતા માણાહ ને સઈખે સુવાણ દેતા નથી. ગમે ન્યા બેલ દબાવીને રેડ પાડવા ઉભા રઈ જાઈ દરવાજે. પોચું ભાળી ગયા છે, બીહાર મા રેડ પાડવા જતા હોઈ તો. તઈણ ગયા હોઈ તો છ થઈને પાછા આવે. આતો આપણી પરજા ડાહી એટલે પરસાદ ધરાવી દ્યે એમકે એનેય બાલ બચ્ચા હોઈ ને. પણ આતો જમ ઘર ભાળી ગયા છે. જો રાજકોટ વાળા જાત ઉપર આવી ગયા ને તો તઈણ ના તેર કરીને આજી ડેમ મા પધરાવી દઈશે. હમણા બેક દી પેલા એક બાપુ ને ન્યા રેડ પાડવા ગયા તો બાપુ એ પોચી પોચી બેક મૂકી ય દીધી. ખોટી જગ્યાએ બારણા ખખડાવે તો ખાવીયે પડે.

અટલે એવું હાઈલે રાખે છે, હાલો ત્યારે અમે ઉભા ગળે વરસાદ ની રાહ જોઈ ને બેઠા બેઠા પાછળ વેતરી  કચ્છ ની મીઠી કેરીયું , ગરમા ગરમ બે પાવરા ઘી નાખીને કુચો વાળેલા પીઝા જેવા ઘવ ના રોટલા સાથે ઉલાળીયે છીએ ત્યારે તમ તમારે સમરીયા વેકેશન મા પંખી જનાવર વીનાના જંગલૂ મા કેમ્પીંગ, બાયું અડધી ઉઘાડી સુતીયું હોઈ એવા દરિયા કિનારે બીચ બાથિંગ કઈરે રાખો,

તિખારો : કહેવત: ખાધા ભેગી ચીકણી થવી...




Thursday, May 6, 2010

હે મારી હાટુ પાટણ થી પટોળા મોંઘા લાવજો...

તમને હયશે કે આ મારો ગોતીડો ક્યાં ખોવાઈ ગયો. તઈણ તઈણ મહિના થી એક લીટી નથી લઈખી. શું કરું રોટલા ના તો કાઢવા ને. આમાં લઈખે કાઈ પેટ નો ભરાય તોયે નવરો આજે થયો છું તો લાવ કીધું લખું ઝરિક. નવા મા તો હમણા તો પાટણ સુરેન્દ્રનગર બનાસકાંઠા બાજુ આંટા મારું છું. જમીનું ગોતવા. મારે વાત કરવી છે પાટણ ની. કઈ જાઈતનો પંથક છે ખબર નો પડે. એક બાજુ ભૂંડેહાલ ભૂખડ કચ્છ, ઉપર નપાણીયું બનાસકાંઠા, પચ્છમમાં માલામાલ કડવા પાટીદારો નું મહેસાણા અને દક્ષિણે સુરેન્દ્રનગર નો બાપુ ડાઈરો. રસ્તા જાણે કુંવારી બાયું ના વાહા જેવા સીધા સપાટ નવા નકોર. વીસ પચીસ વરસ પેલા ઘરે પાણી ની ડંકી ગારવા સાઈડો મૂકતા ત્યારે એમાંથી નળાકાર પાણા નીકરતા. એને તૂટેલી ડોલ નો સળીયો બે બાજુ લગાવી દોરી બાંધી ધમધમાટ ફેરવતા. એવા રોલ ફેરવવા ની મજા પડી જાઈ એવા લીસા રોડ. પરજા પાછી કેવી? માથે સડેલું પનીયું ને નીચે સડેલી ધોતી. દસ પંદર થીગડા વાળો બુશકોટ. અને બાયું ને નાનું ટુંકુ પોલકું ને ચણીયો. માથે નાની ચુંદડી નાખો એટલે બહુ થઇ ગયું. જબરા માણાહ. ઠાકોર, ચૌધરી પટેલ, દરબાર, મુસ્લિમ, હરિજન આવી બધી વસ્તી. બધાય આમતો ખેડું. પણ આપણા કાઠીયાવાડ ખેડું જેવી મેનતું કરે એવા નહી. ખાવા ના ખૂટે પણ સાંજ પડે બેક કોથરી પીધા વિના નો હાલે.  કોણ જાણે કેમ, મારી હારી જમીન જ જાણે કઈ ભાઈત ની છે. ૬ ફૂટ નીચે ખારો. એટલે જે કઈ વાવો એને ઓછું પિત કરવાનું અને થોડુંક અમથું ઉગે એટલે ઉપાડી લેવાનું. બહુ નીચે મૂળિયાં જાઈ  જ નહી. કાલા કપાસ ને જીરૂ ઉગે. આખા પંથક મા ક્યાય ૪ ફૂટ થી ઊંચું જાડવું નો જડે. બધેય જ્યાં જોવો ન્યા બાવળ બાવળ. સાઈકલ ની ટ્યુબ નહી રીંગ માંથી સોસરવો નીકળે એવા કાંટા. ઝાઝી ખમ્મા શંકરસિંહ વાઘેલા બાપુ ની. બાપુ એના ટૂંકા ખજુરિયા (કેશુભાઈ ની પાકી સરકાર માંથી અડધા ઉપરના ધારાસભ્યો ને ખજુરાહો ઉપાડી ગયા ને નવી સરકાર બનાવી તી) રાજ મા ચુંટણી જીતવા રાધનપુર આઇવા તા અને આખા પાટણ જીલ્લા ને લીલો છ્મ કરી દેવા ના અભરખે જ્યાં જ્યાં જગા દેખાણી ન્યા બાવળિયા વાવી દીધા. આ ઈનો પરતાપ.

આયા ના માણાહ બહુ ગરીબ. પણ કરેય શું? તડકા પડે ભૂકા કાઢી નાખે એવા. વેલે ચોટેલી ટેટીયું બફાઈ જાઈ એવી ગરમી. જેમ અમેરિકા મા નવી ગાડીયું ના એ.સી. ચેક કરવા કેમ ડેથ વેલી, નેવાડા મા લઇ જાઈ છે એમ આપણા દેશ મા આયા લાવવા જેવી છે. ગમે એવા એ.સી. ભાંભરડા નાખી જાઈ હો કે. અધૂરા મા પૂરું એમાં આવે ઉડણ. નરી આંખે સુરજ જોયો કોઈ દી? આયા જોવામા વાંધો નઈ. પાવડર જેવી ઝીણી રેતી એટલી ઉંચી ઉડે કે આખું આભ ઢાંકી દ્યે. રાઇતે ઘરમાં ઝીરો નો બલબ બરતો હોઈ એવું થઇ જાઈ ઘડીક વાર તો. આમાં માણાહ શું મરે?

ગામ ના નામે કેવા? લોલાડા, ચંદુર, કુંવર, જેસડા, સમી, હારીજ, ચાણસ્મા, કોરડા, પરસુંદ, ચડીયાણા, અને એવા કેટલાય ગામ. ગામ બધાય ટૂંકા. પાકિસ્તાન થી ભાગલા વખતે આવેલા ઘણા મુસલમાનો અને હિંદુઓ આયા સાંતલપુર પાસે વારી કરીને ગામ છે ન્યા રયે છે. પાટણ જીલ્લા મા મોટા ગામ કઈ તો પાટણ, સાંતલપુર, રાધનપુર, સમી અને હારિજ બહુ થઇ ગયું.. આવા ભૂખડ ગામ છે પણ જુનવાણી ઘણું છે આયા. મૂળ તો આ સિદ્ધરાજ જયસિંહ ની ગાદી ને એટલે જૈનો નું ગામ શંખેશ્વર પાર્શ્વનાથ નું જીનાલય મંદિર, સહસ્ત્રલિંગ તળાવ આવું કેટકેટલુંય જોવા જેવું ખરું. એક મદિર નું તો પાછું નામ છે હાઇકોર્ટ ઓફ કુણઘેર. મા મેલડી ના આ મંદિર ના સત્તર પાટિયા આવે પાટણ ને રસ્તે નીકળો અટલે..

ગમે ઈ હોઈ રોટલા ભેગા બાંધી ને નીકળવું પડે આ બાજુ, સારું ખાવાનું ક્યાય નો મળે આ આખા પંથક મા. હા દારૂ જોઈ એટલો મળે, માલ ની ગેરેંટી. રાજસ્થાન બોર્ડર થી બનાસકાંઠા અને ન્યા થી પાટણ થઇ આખા ગુજરાત મા માલ જાઈ.

લ્યો ત્યારે હવે આયા તો બારે બર્બરતી લૂ વાય છે ત્યારે  બે તઈન તાલાળા ની સાંખ ની કેસર કેરીનો રસ ને રોટલા ઝાપટી ને એ.સી. મા બેઠા છી એટલે ભારે નીંદરૂ ચડી છે તો લાવ ઘડી બે ઘડી ટાઢા પોર ની ખેંચી લવ.. તમતમારે ઘર-ઘોલકા કઈરા કરો.....

Friday, January 15, 2010

કાઈઈઈઇપોઓઓઓ છેએએએએએ....

રાઇડુ પાડી પાડી ને ગળા બેહી ગયા રૂપિયા ૬૦ ના કિલા ના ભાવ ની મણ શેરડી  ખાઈ ગયા, ચાર , પાંચ કિલો ક જેટલી તો દાળિયા, સીંગ, સફેદ ને કાળા તલ ને કોપરા ની ચીકી ખાઈ ગયા, એક કાપી ત્યાં બીજી બે તઈણ આવે એવો જામેલો હતો.

ખીયર એટલે ખીયર. જમાનો બદલી ગયો છે. અમે નાના હતા ત્યારે તો સવાર ના પાંચ વાઈગા માં મેડીએ ચડી જતા. આજે તો સાવ બદલાઈ ગયું છે. વેલા વેલા ઉઠી ને આવી કડકડતી ટાઈઢ માં શું કાઢી લેવા નું?  હેય તારે નવેક વાઈગે તો કૈક ટવરક્  ટવરક્ ચાલુ થયું. કયે છે છેલા બે તઈણ વરહ ને રાહે આ વખતે પવન બહુ સારો હતો સવારથી જ. બારેક વાઈગા ત્યારે કૈક બરોબર જાઈમું,  સાંજ સુધી મા તો આંગળિયું માં ચેકા પાડી નાઈખા. મારી છોડીયું એ તો આટલી પતંગુ એની જીન્દગી માં પેલી વાર જોઈ . સવાર ની નવ વાઈગા ની મેડીએ ગઈ ઈ ગઈ. સાંજે સાડા પાંચે અંધારૂ થયું ત્યારે નીચે ઉતરયુ. એને તો જામો પડી ગયો. ને એમાં ય જયારે નવી પતંગ કપાઈ ને મેડી પર ડોકાય એટલે ઠેકડા ઠેકડી, ચીસાચીસી  અને બઘડાટી. ગમે એ હોઈ આ વખતે વાઘરી ના છોકરા ય ઓછા જોવા મઈલા ઝાખરા ના ઝંડા લઈને. શેરીયુ માં પતંગુ કપાઈ ને એમ ને એમ પડી રયે કોઈ લેવા વારુ નો હોઈ. અમારા જમાના માં તો હાથો હાથ આવી જાતા એક પતંગ લૂટવા હાટુ.  છેલે તો પતંગ ને બુસ્કોટ બેય ફાટી જાઈ પણ બીજો આપણી શેરી માંથી પતંગ લઇ ને જાવો નો જોઈ.

ગમે ઈ હોઈ, પણ મારું હારું એક વાત નો સમજાણી, અમે નાના હતા તેદી આઠ આના ની એક પતંગ મળતી. ૫ રૂપિયા ની વાર જમીન કોય સુંઘતું ય નહી એના ૫૦૦૦ થઇ ગયા પણ  છતાય પતંગ નો બાંધો (૫)  આજેય ફક્ત ૧૫ રૂપિયા માં. ભારે સસ્તું. ફીરકી થોડીક મોંઘી થઇ છે હવે ૧૦૦ થી ૫૦૦ રૂપિયા સુધી આવે છે. એ તો આવખતે ખબર પડી સસ્તો ને જાજો માલ લેવો હોઈ તો ખીયર ને દિ વેલી સવાર મા સદર બજાર માં પોચી જાવ તો મફત ના ભાવે બધું મળે ૨૦ ની ફીરકી ને રૂપિયા ૫ નો બાંધો. બોલો આટલું સસ્તું.  હા તમારો ટાઈમ બગડે કાના બાંધવામા પણ એક ના તઈણ નો કરે ઈ રાજકોટ વાળા નહી.  આ વખતે મોદી સરકાર ને પણ ડહાપણ સુઈજુ કે શું,  ચાઈનીઝ દોરી ગેરકાયદેસર જાહેર કરી દીધી. કયે છે દોરી એવી કડક આવે કે ઉડતા નાના મોટા પંખી તો શું, તમારૂ ય  ડોકું વધેરાઈ જાઈ જો ઘા માં આવી જાવ તો. છતાં પણ દેસી ૩ દોરા, ૬ દોરા, ૯ દોરા અને ૧૨ દોરા બરોબર પાયેલ હોઈ તો ખેંચી કે ઢીલ દઈને ય કાપવાની ભારે મજા પડે. પેલા તો કોક ની કાપો એટલે માણસો થારી વાટકા ને ઢોલ વગાડતા હવે થોડોક ફેરફાર થયો છે, ટેપુ ને  એમ્પ્લીફાયર ઘરી ગયા છે. એના મરી ગયેલા બાપ ને સ્વર્ગ માં ય સંભળાય એટલા તો પાછા જોર જોરથી વગાડે. કોઈનું કાને પઈડુ સાંભરવા નો દ્યે.  તોય જુના જાણકારો નું એવું કેવું છે કે આ વરસે બહુ ઓછા માણાહ મેડીએ ચઈડા. ગામ બહાર ફાર્મ હાઉસ ઉપર માણાહ બહુ વયું ગયું.  આમેય રાજકોટ ની આવી મોઘવારી માં લીધેલ ૬૦ ૭૦ વાર ના મકાન ની મેડી એ કેવડી હોઈ?. અને માથે ચડે તોય એમાં સમાય  કેટલા? અટલે કદાચ ઓછા દેખાતા હશે.

પણ જે હોઈ એ રાજકોટ નો એકેય ચોક એવો નહિ હોઈ જ્યાં ગોશાળા વાળા ફાળા ઉઘરાવવા નહિ બેઠા હોઈ. અમારા કોટેચા ચોક માં તો ૨૫ ૩૦ જેટલા ગોશાળા વારા ઓએ તો બે માણાહ બેહી શકે એવા મંડપ નાખી દીધા હતા આગલા દિ થી જ. મકર સંક્રાંતિ એટલે દાન પૂન નો દિ એટલે ગો શાળા વાળા તો હોય જ ને. ભક્તિ નગર માં એક લાખાભાઈ પટેલ છે એતો દર વરસે આ દિ માટે ટેક લ્યે , સવાર થી બેહી જાઈ ઘર ની બારે ગોશાળા માટે ફાળો ઉઘરાવવા,  આ વરસે ટેક લીધેલી કે જ્યાં સુધી ૩ લાખ રૂપિયાં રાજકોટ ગોશાળા માટે ભેગા નો થઇ ત્યાં સુધી ઉપવાસ ને પાણી નું ટીપુંય મોઢા માં નહી મુકે. આટલા વરસ થયા પણ રાજકોટ ની માણસાઈ કેવી, સાંજે એને ઘરે જમવા ભેગા કરીજ દ્યે, જેટલા ની ટેક લ્યે એટલા રૂપિયા ભેગા થઇ જ જાઈ.માણાહ ક્યાય ક્યાય્ય થી દેવા આવે.

તિખારો : ખીચડો એટલે ખીચડી નો મોટો ભાઈ. બધાય ધાન (ઘઉં, બાજરો, જાર, ચોખા,...) ભેગા કરી ને બા એ ઘરે ખાંડેલો , એને બાફી ને તેલ ની સાથે  ખીયર ની સાજે બધા સાથે બેસી ને ખવાય અને જે તમારે ન્યા અમેરિકન્યા ટીન પેકિંગ મા ય નો મળે ઈ.

Tuesday, January 12, 2010

રા.મ્યુ.કો., ગુ.પા.પુ અને ગ.વ્ય.બોર્ડ, પ્.ગુ.વી.ની.લી.,ધકો બેંક,રા.લો.સંઘ, ને કણકોટ ૧૨૪ માં ૨.૧૫ નો ભાવ

મણ રૂ ની આજની બજાર ૭૦૦ રૂપિયા શું અડી છે અમારે રાજકોટ ના પટેલિયા ના છોકરા ફાટી ને ધુમાડે ગયા છે. બસ વરગી જ ગયા છે. રાજકોટ ગામ ની વસ્તી આમતો કોર્પોરેસન ના ચોપડે ૧૩ ૧૪ લાખ છે પણ આ નવા નવા ઊંચા ઉંચા બિલ્ડીંગુ ને મોલુ ને  ભાળી ને રાજકોટ માં કાયમી રેવા આવે એવા નવા માણસોની નવી આવક ને ધ્યાન માં રાખો તો ૨૦ થી ઓછી તો નય જ હોઈ હવે. એટલે વસ્તી માટે તો રાજકોટ નો પાંચ કીલોમીટર નો વિસ્તાર પણ વધારે કેવાય પણ રાજકોટ શું ભાઈગુ છે. ગામ ના ગોંદરે માણાહ ને મોજમજા માટે બંગલા કરવા છે. અમેરિકાના વિકેન્ડ હાઉસ જેવા. અને આ ગાંડપણે રાજકોટ થી જામનગર ની સીમ માં ઘારી જાવ ન્યા ખેતી ના એકર ના ભાવ ૪૦ લાખ કરી દીધા છે. ૧૨૫૦ ની વાર થઇ, જે જગ્યા રાજકોટ થી ૨૦ કિલોમીટર થાઈ. બેક મહિના પેલા મેં લઇખુતું રાજકોટ માં હવે ૨૫ ૩૦ લાખ ના ઘર માંડ મળે છે આજે તો ૨૫-૩૦ લાખ માં ઘર નું ભૂલી જાવ ફ્લેટે ય માંડ માંડ મળે એવું છે આના કરતા તો અમેરિકામાં તમારે ન્યા આવી જાવું સસ્તું લાગે છે. માર્કેટ જે ભાઈગી છે વાત જ નો પૂછો. ગમે એને પૂછો બસ વાં લીધુ ને વાં દેવાનું છે. બીજી વાત જ નહિ, અને એમાંય હવે આ વરાહ ખેત પેદાઈશ ના ભાવ એવા સારા મઈલા છે એટલે આ ઉનાળે ૧૭ થી ૨૭ ની રેન્જ ના ઘર માં જેટલા કુંવારા હશે એ બધાય ની જાન એકીહારે ખેડું જોડી દેવાના છે. અને જેને છોકરા પઈણી ઉઈતરા છે ઈ બધાય આ જમીનું ની લે વેંચ  માં પડી જાહે. એમાં કોઈ શું કરે , બેક દિ પાન ની દુકાને તમેય ઉભા રયો તો તમેય અમેરિકા બેઠા બેઠા સેવિંગ ના પૈસા નો હિસાબ મારવા માંડો કે એકાદું કટકું લીધું હોઈ તો વાંધો નહિ. જેમ તમારે અમેરિકા માં રહેણાંક મકાન ની માર્કેટ ઉભી પૂછડીએ ભાઈગી તી એમ ગમે એને ગલગલીયા થઇ જાઈ એવી વાતું આયા રોજ સંભાળવા મળે છે . અડધા થી વધારે રાજકોટ ના પટેલિયા ઓ પાસે રાજકોટ થી જામનગર સુધી ની કઈ જમીન ને કયો રોડ ને કયો સર્વે નંબર એ સાથે ની જમીનો ની પ્રિન્ટ હશે. ગમે એ હોઈ ભલે ને શરદ પવાર ૫ -૧૦ રૂપિયા ખાંડ રોજ મોંઘી કરતો હોઈ , સાંજ પડે ૧૦૦૦ વાર જમીન માં ૧૦૦ રૂપિયા ખાલી વાતું એ કરીને ચડી જાઈ એને કઈ મોંઘવારી નડે.

પણ જે છે ઈ આવે છે મજા રોજ ના છાપા વાંચવાની.. એ.પીપાર્ક ૧૫૦ રોડ ૨૫x૫૫ ૧૫૦ ભાવ ૪૦ ૯૬૩૮૫૩૦૦૧૬. (૨) ૧૪ -યુની રોડ, 3bhk,૧૧૦૦ફટ,૭૫વાર્,૪૫lac,9865624324,ત્રીવેદીભાઈ, (૩) દુકાન ૧૪x૩૪ રૈયાચોકડી, ૧૩લાખ ૯૩૪૩૪૨૩૪૫૩ કાનાભાઈ .. આ છે અકિલા ની ટચુકડી જાહેરાતું. આખા ૮ પાના જાહેરાતું ભરીને આવે છે આજકાલ.  આવી જાહેરાતું એ રાજકોટ ની સ્ટાઈલ છે. જેમકે  રા મ્યુ કો. એટલે રાજકોટ મ્યુનીસીપલ કોર્પોરેસન, ગુ.પા.પુ અને ગ.વ્ય.બોર્ડ એટલે ગુજરાત પાણી પુરવઠા અને ગટર વ્યવસ્થા બોર્ડ, પ્.ગુ.વી.ની.લી એટલે પશ્ચિમ ગુજરાત વીજ નિગમ લીમીટેડ, ,ધકો બેંક એટલે ધી કો ઓપરેટીવ બેંક ઓફ રાજકોટ અને છેલ્લે રા.લો.સંઘ એટલે રાજકોટ લોધિકા સંઘ જેનું તેલ (peanut oil)આખું ઇન્ડિયા પીવે છે ઈ.

લ્યો ત્યારે તમે તમારા માલ (stock, real estate) માં જે ડોલરિયા ઓછા થાઈ છે એ જોતા જોતા લમણે હાથ દઈને નિસાસા નાખો, અમે તો આયા રોજે રોજ જમીનું ના ચડતા ભાવ જોઈને ધુબાકા મારવા મંડી...

તિખારો : Tiger Woods to Bill Clinton :  કાનો કરે ઈ લીલા ને હૂ કરું ઈ છિનાળવું?

દરેક પોસ્ટ ની નીચે એક Click to Leave Comments  હોઈ છે. કોક દિ એમાં કૈક લખાય,  તમારા ડોહા નું કાઈ ઘસાઈ નહિ જાઈ, મને ખબર તો પડે કે મારે શું ઢઈડવું...